上星期傳出樂視以天價投得英超香港直播權，而家終於有下文喇。樂視今日喺官方Facebook專頁貼出圖片，問：「9月22日Letv體育有咩大事宣佈呢？」，圖片中有雄獅頭像，跟英超標誌不謀而合，加上印埋Letv體育連同「出大事」標語，相信唔會話重播《獅子山下》或《國家地理雜誌》啩。
其後樂視再貼另一張圖片，寫上「點球？十二碼先啱聽！」並附有中央五台評述員黃建翔06年世界盃十六強意大利對澳洲賽事中嘅激動旁述影片，似乎暗示英超賽事將會有地道廣東話評述。配合9.24「not NOW」（唔使睇NOW？）預告同樂視「9.24 $0?」用戶照片，有望樂視會承接投得英超直播嘅氣勢，推出新一輪（零機價）優惠。
