科技消費

實木皮殼手感佳
M.Craftsman iPhone 6s配件

由女漢子於5年4個月之前發表

皮革同木紋系裝飾可以講係歷久不衰，而且畀人一種典雅感覺。唔想部iPhone 6s裸機咁危險，笠個普通膠殼又嫌樣衰，M.Craftsman iPhone 6s/6s Plus配件以皮革與實木裝飾，設計簡約，不落俗套更顯品味，一套三件有齊保護殼、充電線及電池，亦可單獨購買。

M.Craftsman身為英國品牌，各配件均滲透出高貴英倫風格。保護殼以拼貼方式打斜排列六格大小各異嘅素材，最顯眼嘅係皮革部份，貌似平滑，但仔細睇會見到像真度極高嘅皮紋。木材方面亦採用咗兩種色調，較深嘅近似胡桃木色，較淺嘅微微泛白，均為實木，摸上手有凹凸感，縫接位置造工亦唔錯。

充電池正面大部份以皮革覆蓋，下方放番少量實木點綴，中間設有四盞迷你提示燈，顯示電量狀況。背面、四邊均為金屬材質，內置5,000mAh電量，身型小巧纖薄，尺寸同小型音樂播放器差唔多，絕對放得入褲袋。

為配襯電池同保護殼嘅風格，同系列嘅短身Lightning至USB充電線亦利用近似工藝製作，接頭位標誌經刻印方式壓成，線身以皮革幼帶編織成菱格外層，皮革更為線材提供額外保護。三件M.Craftsman產品均可於HisTrend.HK購入，除咗下圖嘅黑色版本，保護殼同時配備粉紅、紅、灰、啡四色，充電池另提供粉紅、白及卡其三色。

◆ M.Craftsman iPhone 6s/6s Plus配件系列	◆ M.Craftsman 保護殼外觀	◆ 以金色烤漆及典雅字體刻印品牌名字
◆ 底部預留空間予各接口，邊緣帶弧度	◆ 電源鍵開口位置採用相同設計	◆ 音量、靜音鍵亦同理
◆ 內層為防滑膠料	◆ M.Craftsman充電池，跟機附送一條microUSB充電線	◆ 開關、micro USB、USB接口全數置於右側
◆ 右下角印有品牌名字及4盞細小提示燈	◆ 上手感覺似鎖匙包或卡片套	◆ M.Craftsman Lightning至USB充電線
◆ 接頭位置以實木製造	◆ 電線由真皮物料包裹	◆ 全套使用襯到絕