講毒,坊間真係冇邊個平台夠高登毒。集高登一眾毒巴毒絲組成嘅高登管弦樂團,每個團員心中都有一把孤獨嘅聲音,要用音樂先可以傳達出去。嚟緊2017年,成立咗兩年幾嘅高登管弦樂團終於要舉辦處女音樂會,佢哋悉心揀咗幾首由古代毒拎音樂家撰寫嘅曲目,再配上自己嘅FF奇幻故事,務求令觀眾可以喺呢場短短嘅音樂會中搵到共鳴。
真係識功夫?海天堂鬍鬚佬專訪
海天堂廣告睇得多,鬍鬚佬一時扮黃飛鴻帶隊練功,一時又跳入粵語殘片做二打六睇人舞棍舞到flapflap聲,究竟鬍鬚佬係睇得唔打得,定真係識功夫?原來鬍鬚佬細細個真係食過夜粥,入過武館練咗幾手,而且亦因為以習武做起點,輾轉幾十年後終於創立咗海天堂龜苓膏。不過做生意同習武一樣,平日幾順風順水都好,硬係會有對手鍾意挑機踩場,鬍鬚佬最後究竟點化解?且看雜誌分解。
小丑也瘋狂
萬聖節過咗,是咪代表再冇人會扮小丑?No~小丑又不是甚麼鬼怪,唔需要等萬聖節先出動。近日歐美地區頻繁出現嚇人小丑,呢種風氣蔓延得十分快,扮小丑嘅人並唔係為咗帶畀觀眾歡樂,而係恐懼。世上好多事都係一隻手拍唔響,唔係你嚇我,我就要驚。之不過,根據心理學上嘅恐怖谷效應,原來人會驚小丑都好似真係理所當然嘅事。但點解高登巴打又對小丑神愛護有加呢?呢個,原來都一樣有得解。
布甸都要18禁?
入機舖要等到16歲,投票要18歲,睇三級片又要18歲,而家連食個布甸都要等到成年?唔拎係啩?嗱布甸嚟講呢,主要係分成有酒精同冇酒精兩種,對於唔係食開布甸嘅朋友嚟講可能係件幾新奇嘅事,但如果想買布甸畀小朋友做零食嘅巴絲打就要多加注意。今期巴絲打介紹咗十幾款坊間常見日式布甸,除咗教大家辨別邊款有酒精外,亦會講解唔同牌子嘅布甸有乜特別,敬請留意。
《巴絲打》第14期11月5日出版,759阿信屋、OK便利店及各書報攤均有發售。