驟眼睇兩個隨機附送嘅Joy-Con握把以及單購款式，可能只會覺得單購款外殼比較通透、窄身少許，加上大家見到新機心情太興奮，佢哋喺發布會同新聞稿又冇特別強調，好容易以為除此之外並無分別。不過細心翻閱兩款資料同解析圖，跟機版本得個殼，將兩個Joy-Con手掣合體成類近傳統手掣樣式就冇其他作用。

至於單購版全名係「Joy-Con Charging Grip」，中間多咗Charging一個字。簡單嚟講呢個賣US$27.99（HK$217）嘅握把增設咗USB-C接口、充電提示燈，合體或用握把模式打機嗰陣可以同時幫兩個手掣叉電。香港官網配件一欄僅列出Joy-Con，真係唔知代理會唔會入埋Charging Grip嘅貨。唔諗住畀多筆嘅玩家可以用番下列幾種叉電方法：一、駁主機部份插落底座叉；二、主機經USB線叉電嗰陣連住順手叉；三、無視耗用主機電量照駁玩住先。