遊戲內印有紅十字嘅物品代表回血，大量遊戲都有類似設定，但偏偏《Prison Architect》開發團隊就遇上法律問題，原來紅十字國際委員會擁有呢個標誌使用權，並非公開個個都用得，要《Prison Architect》更改血包標誌。

英國紅十字會最近聯絡《Prison Architect》團隊，表示紅十字標誌擁有特殊意義，若任何商業用途包括廣告活動或產品使用該標誌均有違其意義，技術上係觸犯日內瓦公約及英國法律。問題係無數遊戲、電視節目及電影都出現過呢個違規標誌，但只有極少數受質疑，除咗呢隻獨立遊戲之外，據報《Halo》都曾經改走紅十字標誌血包，換成紅色「H」字樣。