以前《Resident Evil》系列不時都會以現實地點改作藍本，並作為故事發生的背景。今集就取景自美國路易斯安那州，帶有外國鄉郊住宅氣息。因為筆者曾經喺外國生活過一小段時間，可以好肯定「外國啲屋真係咁嘅樣」，簡單而言就是將一個四方形切割成數個空間，之間以狹長走廊連接，就算現實中亦會對未習慣嘅人造成壓迫及不安感，《Resident Evil 7》可以話將呢份不安無成功地限放大，特別是傢俱擺設、走過地板時發出的怪聲、以及會迴響於屋內的水管與碰撞聲，引出了藏於生活細節的不安感！只是在大熒幕玩已經令人不寒而慄，一旦戴上VR就連擰轉頭都會「淆」，有時真係會嚇到Hi出嚟！

或者好多人都已經知道遊戲嘅敵人並不只有不死怪人「老豆」同「阿婆」，仲有一大堆不知名的古怪生物，初見感覺似係《～啟示錄》嘅翻版，「喪屍遊戲」感覺減弱不少，不過亦因此令敵人嘅動作及戰鬥方法有更多變化。部份敵人嘅攻擊可以透過踎低之類嘅方式避過，而且當遊戲難度設定得較高嘅時候，呢招更加變成重要嘅技巧之一。順帶一提，第一次玩或對第一身遊戲不太擅長嘅朋友，最好都係先從容易開始，否則即使係初期嘅敵人亦可以兩三下就能解決你！

之前筆者都玩過唔少支援VR，或聲稱以VR遊玩為開發主調嘅遊戲，不過今次《Resident Evil 7》先係第一次真正令筆者覺得「隻Game係為VR而整」。先唔講第一身視點嘅設定優勢，如果你有試過用VR進入遊戲，就會發現從標題畫面已經完全不一樣，所有嘢都係以立體顯示，就連介面都會為VR重新調整，例如子彈介面顯示的位置會由左下變成瞄準方向的右方，感覺貼心又時尚。另外好重要嘅一點，就係用VR裝置玩嘅時候，用視點瞄準比起用手掣來得準確方便，同時亦冇咁易失去攻擊目標，尤其要用近戰武器時更加係無往而不利！

本作VR對應程度之高得可以完全帶玩家進入Bio世界，不過同時令VR裝置另一個尚未解決嘅問題——「頭暈」變得更加嚴重。當你於狹窄的空間來回走動，特別係要用到手掣調整視點，頭暈程度比《Until Dawn: Rush of Blood》高出好幾倍！如果你有幸同不知名怪物嚟個親密接觸，於極近距離泣泣揚揚莫講要打中特定部位，就連自己眼前係乜嘢都完全分不清，只見一堆紋理郁嚟郁去，再加上大量嘅動態、焦點模糊，真係會令人「暈多兩錢重」。以筆者自己打打《Until Dawn: Rush of Blood》大約可支持30分，打《Resident Evil 7》每隔十五分鐘就要稍事休息，各位可自行斟酌。

早期有關方面就已經公佈遊戲會有繁體中文版，呢樣已經唔算係咩新消息，但過癮在今次翻譯字幕甚有「香港味」！例如遊戲開始冇耐，遇上副警長要求拎槍不果，對方只係畀返一把刀仔你嘅時候，就情不自禁就講咗一句「小李老母飛刀」；又例如中段打完不停復活嘅BOSS時，亦極真性情咁爆出一句「死撚左就別動了，好嗎」，當中那份本土味、那份感動，有如滔滔江水……即使係獎盃嘅名稱，今次亦顯得頗有誠意絕非「HEA譯」，例如「庭園深深深幾許」、「裝，都裝，都給我裝」等等，印象分即時無限提升！

特別版書仔粉絲必備！

好多遊戲特別版會附送記念小冊子、遊戲資料集等嘅精品，而今次送出嘅則係足本開發人員訪談，內容涵蓋企劃到製作完成，就算已經爆咗機，亦可以從中暸解到更多遊戲製作背後嘅大小事，如果你係鍾意探究遊戲製作嘅忠實玩家，呢本書仔比起常見嘅資料設定集更值得收藏！

今次畫面處理上Bio用咗全新嘅引擎開發，但若果有留意遊戲畫面，或者已經親身玩過，唔難發現遊戲嘅貼圖同材質睇上去並冇話精細咗好多，筆者認為咁係因為新引擎將遊戲素材整合統一處理，但環境變化同光線質感表現上就強化咗好多，所以即使冇大幅度提升貼圖解像，也能令場景及人物更具現實質感，同時又不會拖慢讀取速度，某程度上正好適合VR裝置。試想像如果圖像太精細，喺VR頭罩下只會令雙眼負擔更大，進一步加劇暈眩感覺。總括而言，今集《Resident Evil》終於再次刺激到玩家的恐怖心理，分分鐘玩到自己嚇自己，解謎份量亦有相當水準，唯故事上與整個Bio系列嘅關連性唔高，其實當成另一隻新作亦無妨。