Peyoung同一平都好興自創獨特口味，一平嗰邊有布丁、酸梅味，Peyoung最具代表性嘅筆者覺得係莞茜味。呢次試食嘅朱古力味係上月出嘅新品，焗法亦係一般撈麵咁上吓，落水、撳蓋3分鐘，之後倒水、落醬、落配料。照舊郁手前觀察吓入面有咩：朱古力醬冇嘢好講，配料入面有不明紅色碎屑以及疑似脆粒。

焗好倒咗水就落嘢喇，首先開包朱古力醬，搵支叉點少許單試。朱古力醬的確係朱古力醬，但人工味連kitkxt之類都比唔上，極似強國產朱古力餅味，質感偏杰。嚟到呢度筆者已知難逃一劫，快脆倒埋包不明配料落去撈算數，撈嗰下至經典，你哋睇相咪以為只係豉油王炒麵，現場望住個麵餅慢慢變到接近黑色（爛機拍攝有色差），真係以為撈緊屎……

進入正題，可能係經歷過一平有免疫力，第一啖未如想像中難食，杰攤攤嘅朱古力醬首先黏晒落條脷度。雖然醬汁比上次易撈，但麵同朱古力醬兩者無法融為一體，感覺麵還麵，朱古力還朱古力，又澀又甜忽然間又無味。脆粒配上醬汁尤如朱古力脆脆，整體衝擊度冇士多啤梨蛋糕撈麵咁高，主要問題出自隻劣質朱古力醬。諗住自己一定輕易食得完，結果係筆者太年輕了，隨住進食量增加，口腔內嘅廉價朱古力味愈趨濃厚，食咗半盒左右真心反胃，直接送剩番嘅去垃圾桶。

事後筆者灌咗兩杯茶再啪成筒糖，hp值先逐漸升番上正常水平，不過陣朱古力味殘留喺編輯部久久不散，畀同事集體投訴同埋怨。經此一役，無論係筆者自己，定編輯部短期內都唔想寫劣食食評住，以免嚴重影響室內空氣質素。