無數港女趨之若鶩嘅Casio自拍神器，今日起正式換代。新型號EX-TR80機身最薄處僅4.6mm，支援更多美顏設定、操作同分享方式，重點係賣價下調，好在情人節過咗先出，否則有女嘅巴打實大出血。

機背鏡頭兩旁就增設LED補光燈各一盞，比起放晒喺一邊光線更均勻，夜晚自拍最啱。今代外框仲識360度旋轉，用家手握之餘亦可吊掛機身，或用外框當作支架進行拍攝。除此之外，EX-TR80加入咗「比較檢視」、「收藏」及「QR code即時分享功能」，即時同框對比兩張相，可以save低效果好嘅設定方便下次使用，傳送至手機會一併生成QR code，方便分享畀朋友同下載。EX-TR80設粉紅、黑、白三色，定價$6,980，比舊機開價平$900。