不少平日要處理文書工作嘅朋友都會選擇添置機械鍵盤，因為機械鍵盤按鍵有獨特回彈力，令打字時更有「手感」同「節奏感」。不過，近年市場亦興起機械式電競鍵盤熱潮，由於機械鍵盤亦有按鍵觸發快速及耐用度高嘅特性，所以同樣適用於講求反應敏銳、對特定按鍵耗用度極高嘅電競遊戲上面。

Kingston旗下HyperX系列一向主打高效能記憶產品及遊戲耳機，最近首度推出Alloy FPS機械式電競鍵盤。作為一個電競鍵盤，HyperX Alloy FPS功能稱唔上十分「戰鬥格」，並冇加入獨立巨集按鍵、自訂功能鍵及專用媒體控制鍵等設計，望落去成個佈局相當正路簡約，定位似係文書打機都啱用嗰種。

HyperX Alloy FPS擁有純黑冷酷外表，配以招牌紅色背光，內置六種不同動態燈光效果、五個亮度等級。雖然冇得自訂背光顏色，但都算係型格十足。1.8m電源線為可拆式，編織式線材不易打結，鍵盤接口霸佔兩個USB頭，不過鍵盤本身亦提供一個USB輸出，順便用嚟插手機充電都冇問題。

鍵盤採用鋼料面板，感覺實淨可靠。官網寫明HyperX Alloy FPS提供青、茶、紅三個機械軸版本，機械軸能承受達5千萬次敲擊，反應速度1000Hz。筆者收到嘅係Cherry MX青軸版，壓按力道為三者中最強，約60g，打字敲擊聲亦都係最響亮，段落手感明顯，有近似傳統打字機嘅感覺。100%防鬼鍵、全鍵不衝突屬遊戲鍵盤最必需嘅功能，撳FN+F12會啟動遊戲模式，避免用家因誤按Windows鍵中斷遊戲而跳回桌面。

如果想進一步增強「戰鬥力」，HyperX Alloy FPS仲附送一套紅色WASD鍵帽，用家只需用鍵帽夾一撳一剔即可更換，紅色鍵帽不但擁有獨特紋理，而且比其他鍵帽略高，打機嗰陣冇咁易撳錯隔籬幾粒掣。