《自殺特攻：超能暴隊》坊間評價麻麻，導演David Ayer轉攻小丑女齣《Gotham City Sirens》，留低呢個系列（爛攤子？）總要有人接手，早兩日盛傳米路吉遜係續集導演人選，最近佢受訪時被問到有關傳聞，大方表示確實有同華納洽談執導《自殺特攻2》事宜，但只係初步商討，並未有定案。

Variety報導指，引起米路吉遜興趣嘅原因並非故事本身，而係演員班底，尤其係韋史密夫。米路吉遜執導《鋼鋸嶺》取得6項奧斯卡提名，包括最佳電影、最佳導演及最佳男主角，更曾鬧過《蝙蝠俠對超人》係一篤屎，或者咁樣算係「不打不相識」。