任天堂Switch北美銷量報捷，頭兩日就打破任天堂過往主機嘅初期銷售紀錄，但玩家逐漸回報各種硬件問題，例如手掣接收不良、屏幕有死點等。就住死點問題，任天堂就覺得自己無錯，係玩家大驚小怪。

Reddit討論Switch死點嘅post回覆數已破2,400，部份唔好彩嘅用戶貼圖指屏幕出現小量死點或光點（dead pixel/stuck pixel，如下圖），未能正常顯示顏色。不過任天堂美國官網聲明指，出現死點或光點乃LCD屏幕特點（characteristic），屬於正常現象，不應視之為缺陷。側邊位算好，如果屏幕中央位有死點，問心嗰句一定玩得唔爽，一點都嫌多，所以外地唔少中伏玩家都選擇換貨。

就當呢單講得通，Switch推出首日網上有不少玩家投訴左邊Joy-Con輸入延遲，甚至零反應，咁係邊個嘅責任？YouTube用戶Jon Downey拆解手掣，發現兩邊設計並不相同，右邊採用獨立天線收發訊號，左邊嘅就係電路板一部份，所處位置經常畀用家姆指遮住，或因而構成障礙。若果你對自己手工有信心，亦唔介意冇咗保養，可以嘗試用銅線加長天線，改裝後接收範圍可達20-30呎。