3D打印房屋好早已經有人挑戰過，最近俄羅斯3D打印公司Apis Cor成功喺建築現場以「旋轉式打印機」直接起好房屋，最精彩嘅係唔使24小時就完成任務，而呢部打印機每次起屋都只需個零鐘頭設定就可以開工。

Apis Cor打印機以特殊混凝土混合物嚟構建圖層，可惜整個建屋過程始終未能單靠機械完成，例如放置玻璃纖維支撐部件（類似鋼筋用途）、安裝屋頂等工作仲需要人手參與。以片中一間409呎房屋為例，全屋成本為US$10,000（HK$77,670），有齊地基、內牆間隔、窗戶、地板、屋頂及天花板等，唔只淨係得四幅牆咁簡陋。