上年HyperX Cloud Revolver推出，雖然標榜配戴舒適、聲音傳送精確，但未有如Cloud II附設USB音效卡線控裝置，對PC用家嚟講吸引力爭少少。新發布嘅HyperX Cloud Revolver S終於添置USB音效卡，提供7.1杜比環繞音效。

金屬鋼架實淨穩固
Revolver S沿用上代黑色金屬鋼架配彈性頭墊內框設計，不過耳罩標誌同車線轉用白色，而唔係一貫嘅紅黑配搭。耳機重量一樣都係376g，鏤空鋼架夾得穩陣，但又未至於感覺夾耳，頭帶相比上代寬闊，耳罩軟墊更厚，舒適程度稍勝一籌。鋼框兩側加入膠製穩定器，減低播放時金屬框架出現嘅振動問題。

聲音表達精確
新一代50mm釹磁鐵指向性驅動單元，同人耳位置平行，提供準確音效輸出，配合封閉式耳罩能隔絕大部份外來噪音，玩家能夠專心投入打機。戴住Revolver S試玩《鬥陣特攻》，發現敵人腳步聲音遠近以及位置都表達得相當準確。

USB音效卡線控裝置
HyperX Cloud Revolver S新增USB音效卡線控裝置，隨插即用，毋須安裝軟件，隨時為耳機提供7.1虛擬環迴音效加持，兼容PC、PS4、PS4 Pro及其他支援USB音效嘅裝置。線控由Cloud II全按鍵改成雙轉盤設計，正面只得7.1聲道開關同收音咪靜音兩個掣，操控直覺順手，線長2.2米。

另有延長線
可拆式指向收音咪獲TeamSpeak及Discord認證，相容於Skype、Ventrilo、 Mumble、RaidCall等各種VOIP通訊程式，並支援降噪功能。Cloud Revolver S可接駁Xbox One、Xbox One S、Mac、PC、PS4、PS4 Pro、流動裝置及VR裝置，附送2米長延長線，以及上面提及嘅USB音效卡線控裝置。

總評：
HyperX Cloud Revolver S比上代及Cloud II表現更全面，而定價亦係喺兩者之上，開價4位數$1,150可能過咗唔少玩家嘅心理關口，即使Revolver S用料較佳，設計上大有改善，相信精明玩家都係會等佢跌價，或者揀番兩個舊型號。