Netflix Marvel超級英雄劇雖然並非套套都係神劇級數，但《夜魔俠》、《Jessica Jones》及《Luke Cage》坊間普遍給予相當高評價。不過《鐵拳俠》首輪劇評出爐，爛番茄新鮮度起初竟然低見0%，到而家亦只係得14%，同其他幾套8-90%嘅作品相距甚遠。

男主角Finn Jones回應《鐵拳俠》首輪負評，佢表示劇集係咪受歡迎涉及好多因素，《鐵拳俠》並非照顧劇評，係為fans而設，部分劇評以特定角度（似乎回應搵白人做主角嘅批評）去評論劇集。Jones認為若果漫畫同Netflix Marvel劇fans以超級英雄片角度睇，相信都會享受《鐵拳俠》，足以同其他The Defenders作品睇齊。值得一提嘅係，寫首輪劇評嘅特選觀眾其實只係睇到頭6集，未睇晒全套就畀到零分，未免有啲唔公平，或者後面7集越來越精彩，可以挽回唔少分數嘅。