LG G6頭批水貨開價超出6千關口，嫌貴大可以等港行，大陸今次就慘喇，韓媒收到風LG可能放棄中國市場，大陸人要買只能夠捱貴水！但香港或者點比都係輸俾美國，上台出機送電視點鬥呀？
根據Damu News情報，去年LG於中國市場佔有率少於0.1%，加上手機部門嚴重虧損，管理層計劃徹底放棄中國市場，唔喺當地發行LG G6，重點發展番南韓、美國、歐洲等主要市場。既然家吓大陸逢韓必反，出咗亦非穩賺，真係唔出或者好過出。
美國方面銷售策略亦明顯搏盡，電訊商Verizon內部文件近日流出，LG G6將於3月17號起接受預購，任何客戶訂機即送Google Home智能喇叭一個。如果新客簽指定無限plan，仲加送一部價值US$350（HK$2,717）嘅43吋LG電視。
