Canon香港正式公布推出3部全新可換鏡頭相機，包括EOS 77D、EOS 800D兩部單反及EOS M6無反相機，除咗將更高嘅規格放到呢幾部中入門機種身上，亦同時加入低耗電藍牙功能，實行要更輕、更強、更方便。

EOS 77D同800D都採用咗APS-C呎吋2400萬像素Dual Pixel CMOS，內置45點全十字型對焦系統，加上有觸控屏幕同埋內置Wi-Fi/NFC/低耗電藍牙技術。其實兩部機嘅功能規格都非常接近，最大分別係在於77D機身設計上採用較直接嘅操作介面，方便比較進階嘅影友快速設定相機各項功能，而800D操作介面則較為簡便，而且機身更加方便較入門嘅用家。

EOS M6外形同之前嘅M3有啲相似，其實操作介面亦中級化，所以操作起嚟感覺完全唔一樣，比較適合攝影技術較進階嘅朋友。同M5一樣佢亦採用咗APS-C呎吋2400萬像素Dual Pixel CMOS，令到相機對焦同追焦速度都大為提升，而且仲支援最高9fps連拍速度，又輕便又夠快，仲有黑銀兩色選擇畀埋個「型」你，吸引力大大提升。