除咗開設手機版網站，而家唔少企業同平台都會寫個官方app出嚟，方便用慣手機戒咗電腦嘅客人使用服務。最近手機應用程式調查公司Sensor Tower發表報告，iOS 11將包含重大系統更新，或因而造成187,000個app無法使用。
Apple自iPhone 5s起改用64-bit處理器架構，提升整體處理效能，不過好多開發者未有與時並進，喺iTunes App Store開放下載嘅app仍然用緊32-bit設計。早兩年Apple預早提醒，未來iOS版本或不再支援32-bit，請開發者盡早更新，但至今依然有8%開發者愛理不理。
年初iOS beta版本內當app唔支援64-bit處理器，系統就會馬上彈出警告視窗。Sensor Tower稱，稍後iOS 11會正式停止支援，屆時嗰187,000個32-bit app將被淘汰。舊年Apple亦大規模清理門戶，將47,000個好耐冇更新嘅app下架，今年行動升級都合理，嚟緊6月舉行嘅WWDC應該係公布嘅好時機。