睇親遊戲直播或者電競比賽，總會有意無意影到張賽車凳款式嘅遊戲椅，造型極具戰鬥格。PC組裝及遊戲配件品牌CORSAIR公布推出首款遊戲椅T1 RACE，大玩賽車座椅設計，坐得舒服，以後打機唔怕打到腰酸背痛。

T1 RACE表面採用PU皮革包裹，提供黃、白、藍、紅或黑五種顏色滾邊，加上汽車配色車縫線。尼龍腳輪能夠喺所有地板上都能保持穩定平滑移動，而4D活動扶手可輕鬆調整高度、寬度、位置和角度，令雙臂能自然舒適咁擺放。鋼結構4級氣壓軸提供穩固嘅坐椅高度調整，椅背支援從90度至180度嘅調節角度，偶爾想中場休息就可以完全躺平唞唞。附設頸、腰椎PU皮革軟枕各一，按用家需要提供足夠承托。定價$2,888，包送貨同安裝，兩年保養。