細細個睇住幪面超人長大嘅朋友，都肯定會有FF過自己有條變身腰帶變成幪面超人。Bandai推出嘅CSM系列幪面超人腰帶，就係專為一眾長大咗嘅幪面超人Fans而設嘅1:1腰帶，不論造功、功能都有如真嘅一樣。今次終於輪到電王腰帶正式開訂，而且仲要一套過連所有配件咁賣，真係要快啲上網訂。

講到平成幪面超人，最受歡迎應該講得上係電王。喺最初TV版故事入面，電王本身已經有8個形態咁多，再加上後來嘅劇場版有唔同角色變身，形態就更加多。今次CSM版電王腰帶套裝，除咗有條腰帶本身，仲有跟齊K-TAROS、G電王Buckle、兩個Rider Pass變身卡片盒同一套六張異魔人卡片，可以組合成10個唔同形態電王嘅腰帶。

◆ 成個套裝入面有齊咁多嘢

◆ 中間位可以發出唔同顏色嘅光

◆ 變成呢十個唔同形態嘅電王

◆ 台詞由原配合人錄製

作為CSM（Complete Selection Modification）系列嘅最新一員，呢條電王腰帶除咗設有金屬壓鑄造成嘅外殼，亦內置有齊電王所有變身聲效同埋相關異魔人嘅專屬BGM同埋台詞錄音，淨係計台詞都超過280組。另外腰帶中間部份會隨住變唔同形態而發出唔同顏色嘅光，配合唔同音效，完全可以將電王入面嘅情節重現於大家眼前。配合埋其他配件，呢條腰帶嘅玩法就更加多，例如喺指定情況下將Rider Pass掃過腰帶正面，就會發出變身聲效；又例如將K-TAROS或者G電王Buckle裝上，又會變咗唔同嘅聲效，非常好玩！大家可以睇睇以下官方嘅示範片就明白。