冇追開日本動漫嘅或者唔知乜係FGO，呢個由TYPE-MOON《Fate》系列衍生嘅game，由2015年開始營運，受歡迎程度及吸金力喺動漫圈內首屈一指。簡單啲可以睇實質數據，根據Sensor Tower統計，綜合Play Store及iTunes Store，FGO於2017年第1季全球遊戲課金榜中排第2，而且幾乎單靠日服就做出呢個成績。現時日本下載數已突破800萬，國服下載量亦突破咗600萬。

所以說明會一開波講到Sony Music Entertainment Japan嗰陣，CEO平井一夫唔用一般音樂印刷打頭陣，反而向投資者提及FGO，SAO、坂道系都排後面，嚴格嚟講唔算意外。全球第2，就算要同其他合作夥伴拆帳都賺到笑喇。平井仲爆料嚟緊FGO準備製作新動畫，以後睇唔啱Xperia手機唔緊要，玩FGO課金佢應該一樣好開心。