上個月尾PSVR《Summer Lesson》上市後，一眾巴打應該同宮本光妹妹玩得不亦樂乎。想更加朝夕相對？日本Premium Bandai推出咗1:1等身大宮本光figure，限量5尊，畀錢就可以實現每日與光妹呼吸同樣空氣嘅夢想！
等身大光妹跟足設定，連底座身高165cm，不過重量約55kg，官方話每尊重量有機會加減5kg，加減都好光妹冇可能咁肥。造工方面極盡細緻，瞳孔顏色漸層上色望落唔錯，再顯淺啲望吓右邊膝頭，連塊膠布都還原咗！編輯部更有同事最近遊日見到試製品實物（最尾），感覺相當高質。買家會獲贈宮本光語音CD、宮本光虛擬信件下載碼。而家開放預約，每尊賣¥2,916,000，訂金¥50,000，日本國內運費另計，視乎地區最高達¥224,500。Bandai仲提醒買家留意搬運要求，有機會入唔到屋……我哋呢啲海外人士都係坐番低睇圖。