Kingston旗下品牌HyperX近年積極由電競耳機擴展至其他相關配件範疇，繼FURY滑鼠墊同Alloy FPS機械鍵盤之後，再推出Pulsefire FPS電競滑鼠，整個電競系列陣容更完整。Pulsefire FPS具備最高3,200DPI靈敏度，並且擁有基本靈敏度級數設定及舒適滑鼠弧線設計，表現可靠，陪住遊戲玩家征戰事半功倍，最緊要係定價$399唔算貴。

Pulsefire FPS外形相當「標準」，唔似得G.Skill RipJaws MX780或Logitech G502 Proteus Spectrum咁奇特搶眼，全黑色機身配以紅色LED燈標誌同滾輪，表面噴有防指紋塗層，滑鼠左面內側配備兩粒按鍵，只適合右手用家使用，預設功能為上一頁/下一頁。除咗滑鼠左右鍵同滾輪鍵之外，剩低仲有粒DPI調節鍵；DPI調節鍵以不同顏色LED顯示靈敏度，400/800/1600/3200 DPI分別以白/紅/藍/黃四色代表。

滑鼠兩側提供防滑膠邊，避免激戰時脫手「甩鼠」，重量分布考慮過機身平衡度，95克相對其他遊戲滑鼠算輕量級，但又未至於太輕飄飄影響手感。滑鼠曲線弧度頗大，後方有足夠位置承托掌心，手大嘅用戶亦可以好舒適咁擺放手掌。同時底部鼠腳面積相當大，滑動表現流暢。接線採用黑紅花紋編織設計，增強耐用性與線材強度，線長1.8m。

嚟到電競滑鼠兩個最核心部分：sensor同微動開關都係名廠出品，左右按鍵均使用Omron微動開關，回彈感清脆爽快，據官方稱左右按鍵可承受2,000萬次點擊。至於Pixart 3310感應器則常用於多款電競滑鼠之上，最高3,200 DPI，提供快捷反應同精確追蹤。唯一要彈嘅係Pulsefire FPS缺乏電競滑鼠常見自訂設置，標誌同滾輪鍵LED燈顏色冇得揀之餘，亦冇提供任何設定軟件。