每個高達fans都一定會記得喺主角身邊彈彈吓嗰隻「哈囉」（ハロ），因為佢嘅出場率可以媲美主角。早前日本宇宙航空研究開發機構（JAXA）送咗隻新相機機械人上太空站，大量日本網民睇完都驚嘆佢同哈囉甚為相似！

相機機械人正式名稱為「JEM自律移動型船內相機」，簡稱「Int-Ball」，重1kg，直徑約15cm。其表面設有12個氣孔，透過噴氣推進移動，開發耗資2,000萬日圓，2017年6月4號由美國運輸火箭運至國際太空站日本實驗樓，9號正式投入試用。雖然塗番做綠色同哈囉好似，但佢暫時淨識得影相拍片，僅用於確認太空人工作狀況，亦未具備語音及自主功能，需要由筑波宇宙中心嘅工作人員手動遠程操作。