嗰頭《死亡筆記》Netflix版出預告，呢頭另一套動漫作品又被帶到去美國真人化。噚日喺《ONE PIECE》連載20周年紀念記者會上，官方就公布《ONE PIECE》將開拍真人版，仲要係劇集，美劇呀！好多fans聞言都表示心情複雜。
《ONE PIECE》美劇版將由Tomorrows Studio製作，名好熟？咪就係《Prison Break》嗰間囉。原作者尾田榮一郎親筆撰寫咗真人化感言，表示大約3年前決定踏出呢一步，佢已向製作公司要求，絕對唔可以背叛20年來支持《ONE PIECE》嘅人，明白fans可能會感到不安，但依然請各位期待今次嘅企劃。講得咁堅決，希望到預告片出現時唔會自打嘴巴。