2015年《神奇4俠》唔單只「拍爛咗」四位超級英雄，就連戲中嘅大反派Doctor Doom亦被批評到一文不值，不但角色奸得好片面，佢個CG面相更加相當「假膠」，不過Fox決定屢敗屢戰，開拍以Doctor Doom為主角嘅電影。

唯一值得安慰嘅係，電影由劇集《Legion》節目統籌Noah Hawley負責，算係信心保證。Doctor Doom屬於Marvel經典奸角，連殿堂級漫畫家兼前Marvel話事人Stan Lee都話過佢最喜歡反派係Doctor Doom，佢認為Doctor Doom係被世人誤解，其實佢並非犯罪分子，只係想統治世界，而統治世界本身唔係罪惡。