打office工長期坐定定唔郁，久而久之身形發福，晚晚OT周末補眠冇時間做gym，一世做肥毒拎……試吓求老細團購呢張健身辦公桌，每日一路踩一路打字，朝九晚五（或更多）踩夠7、8個鐘，起碼有望練番對腳瓜。

呢張嘢有名堂架，叫Exercise Desk，表面上係普通單車腳踏+檯，實際上細節位做得幾足。座椅高度、腳踏與支柱距離分別設7級同3級調較，檯面能夠升降，fit番唔同人嘅身形，座椅最多可承托100kg，普通級數嘅肥仔可以安心就座。右側同後方有鐵籃，供放置火牛拖板及私人物品。

鍛鍊強度用底座中央旋鈕設定，由低至高總共8級，開發公司Bauhutte指第8級感覺似上小斜坡，一般水平嘅人踩5-10分鐘會開始喘氣。豈不是成間office充滿住踩單車聲兼喘氣聲？官方測試話腳踏噪音僅55dB左右，絕對唔會影響工作環境。不過筆者就覺得懶人都一樣減唔到肥，除非佢規定用腳踏發電。Exercise Desk每張未含稅賣¥79,000（HK$5,355），聽日起一連兩日於「第4回WorkStyle變革EXPO」展出。