Forbes今日揭露更多iPhone 8設計資料，編輯稱此為最終定案，新渲染圖所見即所得，不會再作任何改動。當然佢都有介紹其他內部更新，而TouchID去向就有第二個版本。

編輯Gordon Kelly聲稱向配件商Nudos及其他供應鏈查證後，確定iPhone 8屏幕最終大小係5.8吋，邊框闊度4mm。與前代iPhone 7做法一樣，iPhone 8不設3.5mm接口、有立體聲喇叭，充電同數據傳輸冇轉USB Type-C介面，繼續經Lightning，大家啲配件肯定用得著。

上次Nudos嘅渲染圖可見開關掣大咗，今次呢批亦係咁，突然之間改掣係為TouchID留後路，萬一屏底指紋辨識技術開發失敗，Apple就會將指紋辨識移到開關位置。另外，部份屏幕空間畀新機上方鏡頭佔用，傳統方式嘅app通知會被遮擋，iOS11將重新設計狀態列，通知改由最底嘅「Function Area」顯示，僅餘訊號、電量同時間置頂。最後佢補充受惠於全新L型電池，新一代型號嘅續航力遠比iPhone 7 Plus優勝，預計定價介乎US$1,100-US$1,200（HK$8,588-HK$9,368）。