唔知閣下坐飛機嘅經驗多唔多呢？如果你有拎過手提電腦上飛機，應該都會知道過安檢時係需要特登喺袋入面拎部電腦出嚟獨立咁過X光機。但嚟緊可能連相機等比較大嘅電子產品都要咁做喇，事實美國運輸安全管理局（下稱TSA）啱啱就公布咗呢項安檢程序，並計劃先喺10個機場試行。
基於航空安全的威脅日益增加，TSA認為有需要加強安全措施。為咗畀海關人員更清晰咁睇到電子零件內部有冇問題，就公布要求過安檢時乘客需要將袋內所有大過手機嘅電子產品拎出嚟獨立放喺膠盤上過X光機檢查。而呢項措施已於美國境內10個機場實施，並計劃喺幾個月內於美國所有機場實行。
措施當然一定會減慢整體安檢速度，所以如果大家短期內要坐飛機前往美國，最好就預多少少時間。另外計劃其實最終目標喺會喺全球100多個國家近280個機場實施，香港作為國際大都會相信亦唔會幸免。但成件事受到最大影響嘅一定係攝影發燒友同專業攝影師，因為佢哋出外會攜帶嘅攝影器材每每至少都兩、三機幾鏡仲有多支電子閃光燈，要全部拎晒出嚟過安檢，之後再逐一收返入袋，一定會非常麻煩。到時大家要去外地影相，真係要諗諗埋點樣袋套相機先可以易拎出嚟又易放返入去，又或者考慮大部份都直接寄倉好過。