男星占士麥艾禾（James McAvoy）近年幾齣片都光頭或剷青上陣，主要係因為《變種特攻》要扮X教授，嚟到《X-Men: Dark Phoenix》，拍咗四集《變種特攻》嘅佢表示厭倦光頭造型。

占士麥艾禾上月開始剃頭拍《Dark Phoenix》，由於佢以光頭造型拍咗兩套《變種特攻》，大家開始認到佢個光頭look，令佢變成眾人焦點，唔似得當初剃完頭冇乜人認到佢，感覺較自由；而且每隔5至7日生出短髮變平頭裝，佢話覺得自己平頭睇落幾奇怪；至於光頭最大優點係朝早起身唔使打理髮型咁話。原來占士麥艾禾係第三次為《變種特攻》剃頭，從一開始《變種特攻：異能第一戰》已經剃定頭準備演出，但導演Matthew Vaughn後來決定唔想佢光頭登場，最終佢要戴假髮演出。