每年動漫節都係唔少朋友專程去玩去癲順手睇下Cosplay同Show Girls嘅大日子。今年PlayStation一如以往都邀請咗幾位來自台灣人氣Show Girls過嚟同大家見面。咁我哋梗係要同大家搵兩位（筆者個人覺得）最靚嘅嚟影下相拍下片，等各位冇時間去或者迫唔到埋去嘅朋友都可以一睹佢哋嘅風采。
第一位同大家見面嘅就係PinQ憑果茱，據筆者所知即使你係台灣嗰邊嘅龍友，都未必咁容易就可以約到佢出嚟影相。唔係因為佢鍾意釣高嚟賣，而係因為真係太多太多人想約佢影相，條隊排到唔知幾時，呢個情況喺有咁多Model可以選擇嘅台灣真係好少見。而筆者今次見過佢真人之後，就完全受到點解PinQ會咁受歡迎。唔單只有著非常好嘅外形，笑得夠晒Sweet，對大家嘅態度亦異常咁親切，不論男女都會因佢而動心！希望筆者仲有機會再幫佢影相拍片啦～